Жандауурлукъ усталыкъгъа юйрене

Къыйын ауруулары болгъан сабийлеге болушлукъ тапдырыр умут бла КъМКъУ-ну медицина колледжинде жандауурлукъ концерт къуралгъанды. Бу жол ол сырт сюегинде бла мыйысында анапластикалы  эпедиомасы болгъан Мурат Абидовха  билеклик этер ючюн бардырылгъанды.
-Акция тёреге айланнганды. Алты жыл мындан алгъа колледжни выпускниклери аны биринчи кере жарашдыргъандыла. Студентле анга не заманда да тири къатышадыла. Жыйгъан ахча сабий онкология бёлюмге, психоневрология диспансерге, сабий юйге да берилгенди, - деп билдиреди колледжни таматасы Светлана Пшибиева. Ол «Я донор» акциягъа къатышханлагъа, бир инсанны окъуна  жашауун сакъларгъа болушханлагъа ыспас этип, ыразылыкъ письмола тутдургъанды.
Акцияны чеклеринде «Гаражная распродажа» ярмарка да ётгенди. Анда тюрлю-тюрлю азыкъла, татлы ашарыкъла эм башха хычыуун затла алыргъа боллукъ эди. Жыйылгъан ахча Мурат Абидовну саулугъуна багъаргъа жиберилликди. Быллай ишле жаш адамла жазыкъсына билирча, усталыкъларыны магъаналылыгъына тюшюнюрча себеплик этедиле.
Концертге колледжни студентлери бла бирге университетни Гитче школ академиясыны келечилери да къатышхандыла. Жаш тёлю сахнада жырла, назмула да айтханды. КъМКъУ-ну миллет тепсеулерини ансамбли да тау тепсеуню кёргюзтгенди. Медицина ишчилени жашауларыны юсюнден чам халлы сахна оюнла залны бютюн ыразы этгендиле. Медицина колледжни «2-й аппендикс» КВН къаууму да къараучуланы кёллерин кётюргенди.

Магометланы С.

Свежие номера газет Заман


22.03.2017
21.03.2017
20.03.2017
17.03.2017