КъМР-ни Правительствосуну Председателини биринчи орунбасары Уяналаны Казим Прохладный шахарда жыйылыу бардыргъанды. Анда базарлада эм адамла, кёп жыйылып, сатыу-алыу этген жерледе къокъуусузлукъну эм терроргъа къажау мадарланы къурау бла байламлы вопрослагъа къаралгъанды. Аны юсюнден КъМР-ни промышленность эм сатыу-алыу министерствосуну пресс-службасы билдиргенди.

КъМР-ни Правительствосуну кезиулю жыйылыуунда 13 бегимни проекти сюзюлгенди. Кенгешни премьер-министр Руслан Хасанов бардыргъанды.

«Юг России (2008-2013 жылла)» деген федеральный целевой программаны жашауда бардырыуну чеклеринде КъМР-ни Транспорт, связь эм жол мюлк министерствосу Кисловодск - Долина Нарзанов - Жылы Суу - Эльбрус автомобиль жолну жангырта турады, деп билдиреди бу ведомствону пресс-службасы. Объектде ишле 2008 жылда октябрь айда башланнгандыла эм быйыл бошалыргъа керекдиле.

Зольск районда Камлюково элден узакъ болмай, Малка сууну боюнунда «Главстрой КБР» деген чекленнген жууаплылыгъы болгъан акционер общество юзмезни эки, зыгъырны уа юч тюрлюсюн чыгъаргъан дробильный комплексни хайырланыргъа бергенди. Американы «TEREX» компаниясыны агрегатлары бир сагъатха 150-200 тонна продукция чыгъарадыла эм аланы сау жылны файдаланыргъа боллукъду.

Къабарты-Малкъар Республиканы Эл мюлк министерствосундан билдиргенлерича, арт кезиуде сютню аслам халда чыгъарыу аны жарашдыргъан предприятияланы ишлерин кёбейтгенди.

Апрель-май айлада кёзлеге бакъгъан «Ленар» клиника, ветеранлагъа атап, «Эсгериу» деген тёрели акциясын бардыргъанды.

Жылны аллындан бери республиканы халкъны иш бла жалчытыу аралары жиберип 99 адам жангы усталыкълагъа юйреннгендиле.

Бу айны ахырында Санкт-Петербургда грек-рим тутушуудан РФ-ни кезиулю чемпионаты бардырыллыкъды. Анга Къабарты-Малкъарны Элбрус районундан айырыу турнирледен ётген спортсменле къатышырыкъдыла.

Дондагъы  Ростовда грек-рим тутушуудан къарындашла Самургашевланы саугъаларына тёрели халкъла аралы турнир бардырылгъанды.

Пятигорск шахарда «Б» классда Хорламны саугъасына турнир бардырылгъанды. Анга 500-ге жууукъ спортчу къатышхандыла. Элбрус райондан эришиуледе  «Эльбрус» сабий-жаш тёлю спорт школну боксчулары да къарыуларын кёргюзтгендиле.

Кёп  болмагъанлай картингден Краснодар крайда май байрамланы  кюнлеринде Усть-Лабинскде Россейни биринчилиги  эм чемпионаты болгъанды. Анга бизни республикадан «Эльбрус» клубну жаш спортчулары  къатышхандыла. СКФО-дан бла ЮФО-дан эришиулеге онбешден артыкъ  команда  келгенди. Къабарты-Малкъарны спортчулары анда экинчи жерге тийишли болгъанды.